Momente tensioni janë shënuar në tribunën qendrore të stadiumit “Elbasan Arena”, pas përfundimit të pjesës së parë të sfidës mes Dinamos dhe Vllaznisë, në kuadër të ndeshjes së kthimit të Kupës së Shqipërisë.
Teksa lojtarët ishin drejtuar drejt dhomave të zhveshjes, një përplasje mes tifozëve të dy ekipeve shpërtheu në zonën e rezervuar për VIP-at. Për të shmangur përshkallëzimin e situatës, forcat e rendit ndërhynë menjëherë, duke tentuar të largojnë disa prej tifozëve nga stadiumi.
Kjo ndërhyrje shkaktoi reagime të forta, përfshirë edhe presidentin e Vllaznisë, Alban Xhaferri, i cili kundërshtoi vendimin për largimin e tifozëve shkodranë nga tribuna, duke kërkuar sqarime për veprimin e policisë.
Ngjarja ka hedhur një hije mbi atmosferën sportive të përballjes, ndërsa pritet që autoritetet të japin një reagim zyrtar për incidentin.