Sipas kryetarit të KZHZ-së Boris Kondarko në raundin e parë të zgjedhjeve në Maqedoninë e Veriut, Partia VMRO-DPMNE ka fituar në 55 komuna, Koalicioni Vlen në 8, LSDM në 7 Koalicioni AKI i udhëhequr nga BDI ka fituar në 4 komuna dhe Partia Demokratike Turke në 1 komunë.
Pas përpunimit të të gjitha rezultateve do të dihet saktë se në cilat komuna do të ketö edhe balotazh. Në tre komuna nuk është arritur konsensusi i daljes së nevojshme të votuesve, andaj në këto komuna do të ketë përsëritje të votimit.
Mickovski: E ardhmja nuk duhet të pritet
Kryeministri dhe lideri i VMRO-DPMNE-së Hristijan Mickoski tha se zgjedhjet e fundit nuk ishin vetëm për një parti, por për një drejtim të ri për Maqedoninë e Veriut.
“Kemi premtuar fitore dhe e arritëm ate. Qytetari zgjodhi vlera dhe njerëz që besojnë në punë, jo vetëm në fjalë. Megjithatë, kjo fitore bindëse nuk është fundi i rrugëtimit tonë”, deklaroi Mickoski.
Filipçe : Nuk e pritnim këtë rezultatë
Kreu i LSDM-së Venko Filipçe ka shpallur fitore të sigurt në tre komuna. Ai u bëri thirrje qytetarëve që në raundin e dytë të dalin sa më masovikisht në vendëvotime.
” Mendoj se ky rezultat nuk është ai që e dëshironim, por duke pasur parasysh rrethanat, nuk është rezultat i keq, kemi rritje të votave në disa komuna, dhe në këtë drejtim do të punojmë intensivisht në periudhën e ardhshme”, ka deklaruar Venko Filipçe kryetar i LSDM-së.
Mexhiti: Në këto zgjedhje fituan shqiptarët
Koalicioni VLEN ka shpallur fitoren e Izet Mexhitit në komunën e Çairit. Mexhiti tha se në këto zgjedhje fituan shqiptarët, ndërkohë që sipas tij “po pensionohet një klasë politike”. Ai kërkoi dorëheqjen e Ali Ahmetit.
“Në Çair fituan të gjithë shqiptarët dhe u pensionua një klasë politike shqiptare. Urime për pensionimin e kundërshtarëve politikë. Sonte po i drejtohem kundërshtarit tim politik Ali Ahmetit me plot respekt dhe qartësi, ky është çasti ku duhet të dorëhiqesh. Vota e shqiptarëve të dërgoi në pension politik”, ka thënë Izet Mexhiti.
Osmani: Urime kundërkandidatit për fitoren
Kandidati i AKI-së për kryetar të Çairit Bujar Osmani i ka uruar fitoren kundërkandidatit të tij nga VLEN Izet Mexhiti. “Në politikë fjala e fundit u takon qytetarëve. Për hapat e ardhshëm politik, do të njoftoj në ditët në vijim”, shprehet Bujar Osmani.
Bilalli : Në Tetovë fitoi referendumi shqiptar
Kandidati i VLEN-it për kryetarë të Tetovës Bilall Kasami ka thënë se është në epërsi kundrejt kandidatit të tij me më shumë se 4000 vota. “Kjo është nata më e bukur se e fituam gjithë Pollogun, e fituam gjithëMaqedoninë. BDI-ja kërkoi referendum, e fitoi referendumin”, është shpreh Kasami.
AKI: Për herë të parë Çashka do të këtë kryetar shqiptar
Nënkryetari i BDI-së Arbër Ademi ka thënë se në Komunën e Çashkës është shënuar historia nëzgjedhjet lokale të 19 tetorit sepse atje për herë të parë është zgjedhur një kryetar shqiptar.
” Koalicioni AKI ka fituar në komunën e Gostivarit, ndërkohë në Kërçovë dhe Strugë shkon në balotazh”, pohon Ademi.
Në ditën e zgjedhjeve arrestohen 11 persona
Ministri i Punëve të Brendshme Pançe Toshkovski në një konferencë për media ka informuar për arrestimet që kanë ndodhur ditën e zgjedhjeve. Këto zgjedhje ishin më të qetat dhe më demokratiket deri më tani.
Dëshmuam se kur instutucionet funksionojnë, demokracia është në rritje. Janë denoncuar 91 raste në gjithë Maqedoninë e Veriut, shumica prej tyre kanë të bëjnë me blerjen e votës dhe fotografimin e votës. Janë arrestuar 11 persona, katër janë liruar ndërsa 7 të tjerë janë në procedurë e sipër”, thotë Ministri i Brendëshëm Toshkovski.
Raundi i dytë i zgjedhjeve në ato komuna ku do të ketë balotazh do të mbahet e 2 nëntor./DW