Autoritetet në Durrës po hetojnë ngjarjen e rëndë ku një 18-vjeçare italiane ka kallëzuar për përdhunim Leonard Prezën, 26 vjeç, punëtor shezlongësh dhe baba i tre fëmijëve.
Sipas raportimeve, ngjarja ka ndodhur në orët e para të mëngjesit pranë një hoteli, ku vajza ishte ulur në një stol me shoqërinë e saj. Preza i është afruar fillimisht, duke tentuar t’i shiste drogë, dhe më pas e ka bindur të zhvendosen te shezlonët, ku sipas kallëzimit, e ka sulmuar dhe përdhunuar.
Në dëshminë e saj, 18-vjeçarja ka treguar se pavarësisht tentativave për t’u mbrojtur, nuk ia doli të shmangte abuzimin. Ajo u dërgua në spital për ekzaminime të hollësishme mjekësore, ku u konstatuan shenja të dukshme dhune në duar, qafë dhe pjesë të tjera të trupit.
Leonard Preza ka mohuar akuzat, duke deklaruar se marrëdhëniet me vajzën kanë qenë konsensuale. Ai nuk është person i panjohur për policinë, pasi më herët është arrestuar për vjedhje dhe armëmbajtje pa leje.
Hetimet për zbardhjen e plotë të rrethanave të kësaj ngjarjeje të rëndë vijojnë.