Një ngjarje e rëndë tronditi mbrëmjen e sotme fshatin Pllanë në Lezhë, ku u vra me armë zjarri 64-vjeçari Gjovalin Prendi. Viktima u qëllua në afërsi të banesës së tij dhe humbi jetën në vend, ndërsa rrethanat e krimit mbeten ende të paqarta.
Policia ka reaguar menjëherë, duke konfirmuar identitetin dhe moshën e viktimës. Në vendin e ngjarjes kanë mbërritur forca të shumta policore, të mbështetura nga Forca Kombëtare e Sigurisë, Njësia Shkodër.
Po ashtu, është ngritur një grup i posaçëm hetimor që, nën drejtimin e Prokurorit të çështjes, ka nisur veprimet për zbardhjen e plotë të krimit.
Njoftimi i Policisë së Shtetit:
“Lezhë/Informacion paraprak. Në fshatin Pllanë, në rrethana ende të paqarta është vrarë me armë zjarri shtetasi Gj. P. 64 vjeç, banues në Pllanë, Lezhë.
Forca të shumta të Policisë kanë shkuar në drejtim të vendit të ngjarjes të mbështetura nga Forca Kombëtare e Sigurisë, Njësia Shkodër. Ndërkohë është ngritur një grup i posaçëm hetimor i cili ka shkuar në vendin e ngjarjes, dhe nën drejtimin e Prokurorit, po kryejnë veprimet hetimore me qëllim zbardhjen e ngjarjes.”
Hetimet vijojnë intensivisht për të identifikuar autorët dhe motivet e këtij ekzekutimi.