Erjon Alibej, bashkëpunëtor i drejtësisë në çështjet e trajtuara nga SPAK, ka dëshmuar mesditën e sotme nga ambientet e Prokurorisë së Posaçme, përmes një lidhjeje video-konference, në një proces gjyqësor që po zhvillohet në Belgjikë për vrasjen e Arjan Spahiut.
Alibej u shoqërua nga burgu nr. 313 drejt ambienteve të SPAK, ku në prani të kryeprokurorit Altin Dumani, u lidh me autoritetet belge për të dhënë dëshminë e tij në gjyqin penal ndaj të pandehurve Franc Çopja (Gagarin), Blerim Mamutaj, Elton Roçi i njohur si “Fat Katnari”, Endrit Sadedini (aktualisht i burgosur në Shqipëri), Elvis Murataj dhe Eljo Bitri.
Gjatë dëshmisë, Alibej ka ripërsëritur të njëjtin kalvar vrasjesh dhe rrethanash kriminale që kishte deklaruar edhe disa muaj më parë në Gjykatën e Posaçme në Tiranë.
Në dosjen belge përfshihet edhe Eljo Bitri, i identifikuar si vrasës me pagesë, i dyshuar për kryerjen e një sërë krimesh në Durrës, Elbasan, Kavajë dhe Belgjikë. Bitri u arrestua fillimisht në Holandë, i armatosur me dy pistoleta, dhe pas ekstradimit në Belgjikë vendosi të bashkëpunojë me prokurorinë belge.
Ndërkohë, Elton Roçi, kushëriri i Eljo Bitrit dhe i arrestuar nga SPAK në kuadër të operacionit “Plumbi i Artë”, dyshohet se ka shitur informacion dhe ka ndihmuar në organizimin e vrasjes së Arjan Spahiut në Molenbeek, në vitin 2020.
Sipas dokumenteve hetimore, Roçi ka qenë shok fëmijërie me viktimën dhe ka shërbyer si ndërmjetës në takimin e parë mes Arjan Spahiut dhe Nuredin Dumanit, nga i cili më pas u arrit një marrëveshje kriminale trepalëshe mes Dumanit, Spahiut dhe Alibejt për kryerjen e disa vrasjeve në Durrës, Peqin dhe Elbasan.