Gjykata e Brindisit në Itali ka shpallur vendimin për një grup italo-shqiptar të përfshirë në trafikun ndërkombëtar të kokainës dhe heroinës nga Holanda në Itali. Në total, 7 të pandehur janë dënuar me 80 vite burg, ndërsa 3 shtetas shqiptarë kanë marrë një dënim të kombinuar prej 48 vitesh burg.
Procesi gjyqësor u zhvillua në shkallë të parë dhe u finalizua të hënën, më 14 korrik 2025, me vendimin e lexuar nga kryetarja e trupit gjykues, Stefania De Angelis. Hetimi u udhëhoq nga Prokuroria Anti-Mafia e Leçes (DDA), me prokurore Giovanna Cannarile, dhe nisi me bastisjet e Guardia di Finanza gjatë operacionit “Tackle” në janar 2022.
Të dënuarit shqiptarë:
Kujtim Metaj, 60 vjeç – 22 vjet e gjashtë muaj burg (konsideruar si promotori kryesor i grupit).
Adrian Boci, 35 vjeç – 13 vjet e gjashtë muaj burg, dënim i vazhduar nga një çështje e mëparshme.
Romeo Myftari, 43 vjeç – 12 vjet burg.
Sipas vendimit gjyqësor, Metaj kishte rol drejtues në rrjetin kriminal të përbërë kryesisht nga shtetas shqiptarë dhe figura italiane si Pierluigi Chionna, i cili tashmë ka marrë statusin e dëshmitarit bashkëpunues.
Të pandehurit u përballën me akuza për pjesëmarrje në organizatë ndërkombëtare për trafik droge; Zhvatje me metoda mafioze; Prodhim, posedim dhe shpërndarje narkotikësh.
Gjykata ndaloi gjithashtu që të dënuarit të ushtrojnë funksione publike në të ardhmen.