Policia greke shkatërroi një organizate kriminale, anëtarët e së cilës vendosnin gjoba nëpër lokale, kryenin shpërthime, zjarrvënie, dëmtime trupore, falsifikime, vjedhje e trafik droge.
Kjo organizatë kriminale ishte aktive në zona të ndryshme të Athinës.
Për të zbërthyer organizatën kriminale, gjatë datës 14 korrik 2024 u krye një operacion i koordinuar policor.
Si rezultat i këtij operacioni u arrestuan 17 persona, nga të cilët 3 ndodhen në paraburgim.
Nga hetimet e deritanishme të Prokurorisë: janë zbardhur 78 gjobvënie ndaj lokaleve, 5 zjarrvënie, nga të cilat 1 në një automjet, 1 shpërthim në karburant dhe 1 në një shtëpi si dhe 1 rast lëndimi trupor, ndërsa gjatë hetimeve të kryera ndër të tjera u gjet arsenal armësh, sasi lënde narkotike dhe shuma të mëdha parash.
Sipas policisë greke, bëhet e qartë se anëtarët e saj synonin të zëvendësonin rolin shoqëror dhe detyrat zyrtare të Policisë greke.
Organizata kriminale synonte që palët e vëna nën shantazh t’i referoheshin organizatës kriminale “për zgjidhjen e çdo çështjeje” dhe jo policisë greke.
Policia greke, mes 17 personave, ka vënë në pranga edhe shtetasin shqiptar Xhorxhi Gjoka 43 vjeç, ndërsa u ka komunikuar urdhër arrestin në burg shqiptarëve Evis Shyti 40 vjeç, Geni Cato 37 vjeç nga Përmeti dhe Marsel Stafaj 36 vjeç nga Tirana.
Shyti dhe Cato rezultojnë të arrestuar në prill të 2024 si autorë të vendosjes së një sasie eksplozivi në rrugën “Skylitsi” në Piremë 8 mars.
Gjatë kontrollit të banesës së Xhorxhi Gjokës, u sekuestruan 240 euro, 3 celularë, 1 shkop metalik si dhe 1 automjet “Seat” dhe një motorr “Honda Varadero”.
Shqiptarët e arrestuar rezultojnë pjesëmarrës në disa prej episodeve të zbuluara nga policia greke.