Situata paraqitet tepër kritike në juglindje të vendit, ku zjarri që ka përfshirë zonën nga fshati Vërnik deri pranë pikës kufitare të Kapshticës ka marrë përmasa shqetësuese. Flakët po afrohen me shpejtësi drejt aksit rrugor Kapshticë-Bilisht, duke rrezikuar seriozisht qarkullimin dhe zonat përreth.
Pavarësisht ndërhyrjes së më shumë se 100 efektivëve nga shërbimet zjarrfikëse, policia kufitare dhe strukturat pyjore, zjarri ka shkatërruar sipërfaqe të mëdha me bimësi të ulët dhe kullota, duke u përhapur me intensitet për shkak të terrenit të thate dhe erës.
Forcat zjarrfikëse janë aktualisht të pozicionuara përgjatë rrugës nacionale, në përpjekje për të ndaluar flakët që të kalojnë në anën tjetër të rrugës dhe të rrezikojnë objekte dhe banesa të mundshme.
Në përballje me këtë emergjencë, pala shqiptare ka kërkuar ndihmë ajrore nga autoritetet greke, por deri më tani nuk është dhënë asnjë përgjigje zyrtare.
Ndërhyrja e shpejtë në terren ka mundësuar shpëtimin e dy fermave bletarie dhe disa mjeteve të sekuestruara nga policia kufitare, duke shmangur dëme më të mëdha në prona private.