Agjencia Evropiane e Barnave (EMA) konfirmon se nuk ka prova shkencore që lidhin përdorimin e paracetamolit gjatë shtatzënisë me autizmin tek fëmijët. Ky reagim vjen pas deklaratave të presidentit amerikan Donald Trump, i cili pretendoi pa bazë shkencore se përdorimi i Tylenolit nga gratë shtatzëna mund të shkaktojë autizëm.
EMA thekson se paracetamoli mbetet një opsion i sigurt për trajtimin e dhimbjeve dhe etheve tek gratë shtatzëna, duke u përdorur vetëm kur është klinikisht i nevojshëm, në dozën më të ulët efektive dhe për kohën më të shkurtër të mundshme.
Drejtori Mjekësor i agjencisë shprehet se këshillat bazohen në vlerësim rigoroz të të dhënave shkencore, dhe studimet ekzistuese nuk tregojnë asnjë rrezik për keqformime tek fetusi apo tek të porsalindurit. Gratë shtatzëna këshillohen të konsultohen me mjekun para përdorimit të ilaçeve.