Ministrja për Europën dhe Punët e Jashtme, Elisa Spiropali, gjatë vizitës së saj zyrtare në Hagë, takoi ish-presidentin e Kosovës, Hashim Thaçi, i cili ndodhet në paraburgim të Gjykatës Speciale.
Pas takimit, Spiropali theksoi se i ka përcjellë përshëndetjet e saj, të qeverisë shqiptare dhe të gjithë popullit shqiptar, përfshirë edhe tre ish-udhëheqësit e tjerë të UÇK-së: Kadri Veselin, Jakup Krasniqin dhe Rexhep Selimin. Ajo vuri në dukje se Thaçi ishte në gjendje të mirë dhe ndjek zhvillimet në Shqipëri dhe Kosovë.
“Më vjen mirë që e gjeta presidentin Thaçin në gjendje të mirë. Ne urojmë që procesi i drejtësisë të sjellë drejtësi historike dhe jo padrejtësi historike,” deklaroi Spiropali.
Ministrja shprehu mbështetje për një proces të rregullt ligjor dhe theksoi rëndësinë e respektimit të drejtave të njeriut, duke vënë theksin te diferenca midis luftës për liri të popullit të Kosovës dhe përgjegjësive individuale që mund të lindin nga akuzat.
“Lufta e popullit të Kosovës për mbrojtjen e shtëpive dhe jetës së tyre nuk mund të njolloset. Duhet bërë ndarje e qartë midis kontekstit historik dhe barrës ligjore, në mënyrë që sakrificat e një populli të tërë të mos shkelën,” shtoi ministrja.
Spiropali përfundoi se edhe pas përfundimit të procesit ligjor, duhet të sigurohet drejtësi për luftëtarët, Kosovën dhe të vërtetën historike.