Policia e Shtetit ka njoftuar finalizimin e procedurave për ekstradimin në Shqipëri të tre shtetasve të shpallur në kërkim ndërkombëtar, në bashkëpunim me Interpol Tiranën dhe autoritetet në Greqi, Belgjikë dhe Serbi.
M. H. alias M. P., i arrestuar në Greqi, ishte dënuar me 4 vjet burg për “pastrim parash” nga veprimtari kriminale në Itali. Nga dënimi, i mbeten për të vuajtur 3 vjet e 9 muaj.
A. G., 40 vjeç, u ekstradua nga Belgjika pas dënimit me 3 vjet e 4 muaj burg nga Gjykata e Apelit Tiranë, për kultivimin e 140 bimëve narkotike në fshatin Grizë.
S. O. u kap në Serbi dhe u ekstradua në bazë të një vendimi të Gjykatës së Kukësit për “trafikim të mjeteve motorike”. Ai akuzohet për trafikimin në Shqipëri të një automjeti të vjedhur në Francë.
Policia e Shtetit thekson se do të vijojë bashkëpunimin ndërkombëtar për të sjellë para drejtësisë të gjithë personat e kërkuar.