Egnatia ka arritur të sigurojë një vend në finalen e madhe të Superiores pas barazimit pa gola me Partizanin në “Arenën Kombëtare”. Ky rezultat i mjaftoi skuadrës nga Rrogozhina për t’u kualifikuar në finale, ku do të përballet me Vllazninë për titullin kampion të sezonit 2024/25.
Ndeshja nisi me një ritëm të lartë nga të dyja skuadrat, ku Partizani pati disa mundësi më të mira për të shënuar. Megjithatë, në pjesën e dytë, Egnatia u kthye më e fuqishme dhe pati raste për të kaluar në avantazh, por portieri Pano Qirko qëndroi i pakapshëm.
Ky barazim e dërgoi Egnatian në finalen kundër Vllaznisë, që pas 24 vitesh kërkon të fitojë titullin kampion. Për Partizanin, mbetet të luajë për vendin e tretë ndaj Dinamos. Finalja do të zhvillohet të hënën, më 12 maj, në orën 20:00, në “Arenën Kombëtare”.