Futbolli shqiptar do ta mbyllë vitin 2025 me finalen e Superkupës së Shqipërisë, e cila do të luhet më 28 dhjetor në “Air Albania Stadium”. Përballë njëra-tjetrës do të jenë Egnatia dhe Dinamo City, në një duel që vendos në lojë trofeun e parë sezonal.
Dy skuadrat do të përballen për herë të 30-të në histori, me bilancin që favorizon Egnatian. Skuadra nga Rrogozhina ka regjistruar 15 fitore, ndërsa Dinamo City ka fituar 5 herë, me 10 ndeshje që kanë përfunduar në barazim.
Edhe statistikat e golave janë në favor të Egnatias, e cila ka shënuar 37 gola kundrejt 19 të Dinamos në përballjet direkte mes tyre.
Finalja e Superkupës pritet të dhurojë emocione dhe rivalitet sportiv, me të dyja skuadrat që synojnë ta mbyllin vitin kalendarik me fitimin e një trofeu të rëndësishëm në futbollin shqiptar.