Nga Kamza, në një diskutim me prindër, Edi Rama deklaroi se qeveria po studion të gjitha aspektet, në lidhje me rrjetet sociale.
Rama thotë se bllokimi i plotë i Tik Tok do të shërbente si një rrugëzgjidhje, edhe për një periudhë kohe, teksa shprehet se problemet me rrjetet sociale, tashmë po diskutohen në shumë vende të botës.
“Fëmijët tanë nuk janë vetëm me ne dhe me shokët. Sot ata kanë edhe një shok tjetër që e preferojnë më shumë se ne, se librat, që është shoku që iu del kur futen në telefon nëpër rrjetet sociale.
Posaçërisht në Tik Tok, por jo vetëm, ata kanë një shok që iu thotë të kundërtën e asaj që m,und t’iu themi ne në shtëpi, mësuesi në klasë. Ne bëhemi palë në gabim, kur për të pasur një moment qetësie, ia lëmë në dorë shokun. Ky është një fakt me të cilat përballen të gjitha shoqëritë sot. Në shtetet demokratike ka filluar një debat. Ka lindur një debat i madh botërisht në shumë vende, që këto rrjete duhet të merren nën kontroll, të paktën për fëmijët nën 16 vjeç. Nuk ka akoma mekanizma teknologjike për të vendosur filtra për të ndarë, kush është fëmija, kush është i rrituri. Ne jemi duke i studiuar të gjitha aspektet, jemi të prirur të besojmë, se bllokimi i plotë i Tik Tok, do të ishte rrugë, qoftë edhe për një periudhë, për të parë se çfarë do të bëjnë të tjerët, për ta hequr një shok shumë të keq nga duart e fëmijëve dhe për të pasur më shumë kontroll”, theksoi ai.