Kryeministri Edi Rama ka ironizuar ish-kryeparlamentaren Jozefina Topalli, duke e krahasuar me një “Doruntinë të re”, e cila, sipas tij, “vajton me lotë të rrjedhshëm vdekjen e pluralizmit”, ndërsa nuk kupton realisht sesi funksionon angazhimi me diasporën.
“Në çdo territor dhe në diasporë, kemi pasur një volum të jashtëzakonshëm mbështetjeje që solli dallgën e 11 majit,” u shpreh Rama, duke shtuar me ironi:
“E rikthyer si një Doruntinë në një version satirik të legjendës, mbi samarin e listës së mbyllur të mushkës gërmuqe të partisë, vajtonte një ditë pluralizmin me lotë rrëke, bashkë me një grup zarfash të ardhur nga Greqia në drejtim të Beratit, ku Partia Socialiste mori mbi 90% të votave.”
Sipas Ramës, kritikat për procesin zgjedhor dhe rezultatet janë thjesht hipokrizi nga njerëz që nuk kanë asnjë ide se si punohet realisht me diasporën.
“Vdiq pluralizmi, thoshte! No koment, no koment… Kuku e mjera unë – dhe lotët çurk,” shtoi Rama me sarkazëm.
Ai përmendi se ndërsa kundërshtarët vajtojnë për pluralizmin e rënë, PS dhe strukturat e saj kanë punuar konkretisht me komunitetet jashtë vendit, duke krijuar një valë mbështetjeje që reflektohet në rezultatin zgjedhor.