Policia e Vlorës ka vënë në pranga dy të rinj me shtetësi të huaj, pasi u kapën në flagrancë duke shpërndarë lëndë narkotike në fshatin turistik të Dhërmiut.
I pari është një 30-vjeçar nga Malajzia, i identifikuar si J. S., tek i cili, gjatë një kontrolli në banesën ku qëndronte, u sekuestruan sasi të vogla kanabisi dhe kokaine.
Ndërsa i arrestuari tjetër, shtetasi britanik O. S., 22 vjeç, u kap me disa doza kokaine dhe tableta ekstazi gjatë kontrollit fizik nga policia.
Të dy personat po hetohen për veprën penale “Prodhimi dhe shitja e narkotikëve”, ndërsa dosja e tyre i është referuar Prokurorisë pranë Gjykatës së Shkallës së Parë të Vlorës. Operacioni vjen në kuadër të masave të shtuara për garantimin e sigurisë në zonat bregdetare gjatë sezonit turistik.