Një ngjarje e rëndë ka tronditur komunitetin në Epagny të Zvicrës, ku dy persona u gjetën të vdekur mes rrënojave të një shtëpie të përfshirë nga flakët. Viktimat janë një çift me origjinë nga Kosova: një burrë 41-vjeç dhe një grua 39-vjeçare.
Sipas hetimeve paraprake të 48 orëve të fundit, burri i armatosur me një pushkë ka shkuar në vendin e punës së gruas, ku ajo punonte si pastruese. Më pas, ai ka hyrë në banesë dhe ka qëlluar disa herë mbi të, përpara se të vetëvritej.
Shkaku i zjarrit që shkatërroi shtëpinë mbetet ende subjekt i hetimeve. Autoritetet kanë konfirmuar se burri kishte qenë më parë i punësuar në një kompani fqinje, por ky fakt nuk ka lidhje direkte me ngjarjen tragjike.
Çifti thuhet se kishin probleme të vazhdueshme. Prokurori i Përgjithshëm ka bërë të ditur se që nga shtatori i vitit 2024, ishin hapur procedura për dhunë në familje.
Burri ishte arrestuar më 18 shtator dhe u mbajt në paraburgim deri më 5 dhjetor të po atij viti, përpara se të lirohej me disa kushte, përfshirë një urdhër ndalimi, terapi për menaxhimin e dhunës dhe mbikëqyrje me kusht. Hetimet për zbardhjen e plotë të ngjarjes po vazhdojnë.