Një ngjarje e rëndë ka ndodhur mbrëmjen e djeshme në rrugën Karolou në lagjen Metaksurgjio të Athinës, ku një person mbeti i vrarë në mes të qytetit.
Burime policore njoftojnë se viktima që njihet si përdorues droge në zonë, mendohet të jetë qëlluar me thikë.
Pasi disa persona panë ngjarjen ata i erdhën në ndihmë. Edhe pse u dërgua brenda pak minutash në spitalin Gjenimatas të Athinës, fatkeqësisht mjekët nuk mundën ta shpëtonin.
Gazetari i Top Channel Artur Bibe siguroi pamjet ekskluzive në të cilat dallohet viktima që po ecën në rrugë i plagosur.
Ai vërehet teksa nuk mund të qëndrojë dot në këmbë dhe ulet në tokë.
Pak sekonda më vonë ai vë re hemorragjinë në zonën e këmbëve dhe kërkon ndihmë nga kalimtarët të cilët fillimisht nuk e ndihmojnë.
Pak më vonë një kalimtar i vjen në ndihmë dhe njofton policinë.
Por është vonë për viktimën i cili dallohet në pamje se humb ndjenjat dhe pas pak çastesh ndërron jetë.
Fillimisht policia mendoi se mund të jetë vetëvrasje por pamjet tregojnë se viktima ka marrë plagë me thikë.