Një vajzë 21-vjeçare nga Kosova ka ndërruar jetë në mënyrë tragjike pas një aksidenti të rëndë rrugor në Gjermani. Ngjarja ndodhi të enjten në autostradën B28, në afërsi të qytetit Reutlingen, ku e reja me inicialet Y.H., duke udhëtuar nga Metzingen drejt Reutlingen, humbi kontrollin mbi makinën e saj.
Sipas raportimeve të mediave gjermane, automjeti doli nga rruga dhe u përmbys disa herë, duke u dëmtuar rëndë. Menjëherë pas aksidentit, në vendngjarje mbërritën ekipet e shpëtimit dhe një helikopter mjekësor, ndërsa autostrada u mbyll për disa orë.
E reja u transportua me urgjencë në spital dhe u vendos në kujdes intensiv, por fatkeqësisht nuk mundi t’i mbijetonte plagëve të rënda dhe ndërroi jetë të shtunën, dy ditë pas aksidentit.
Policia gjermane ka nisur hetimet për të sqaruar plotësisht rrethanat e aksidentit. Ndërkohë, lajmi për vdekjen e saj ka tronditur komunitetin shqiptar në Gjermani dhe ka zhytur në dhimbje familjen dhe të afërmit e saj në Kosovë.