Kombëtarja shqiptare e futbollit ka arritur për herë të parë në historinë e saj play-off-in e Kupës së Botërorit, duke qenë vetëm dy ndeshje larg realizimit të ëndrrës për të gjithë tifozët kuqezi. Por rregullorja e FIFA-s parashikon një situatë të veçantë për skuadrat që humbasin gjysmëfinalet.
Sipas shortit, skuadrat janë ndarë në vazo: më 26 mars, ekipi i vazos 2 do të presë skuadrën e vazos 3, ndërsa skuadra e vazos 1 do të luajë me atë të vazos 4. Fitueset e këtyre çifteve do të përballen më 31 mars në finalen e madhe për një biletë në Botërorin 2026.
Por humbësit nuk shpëtojnë nga fusha. FIFA kërkon që më 31 mars të zhvillohet një ndeshje mes skuadrave që humbën gjysmëfinalet, në një sfidë miqësore të paracaktuar nga shorti. Kjo ndeshje, që konsiderohet nga shumë ekipe si e panevojshme, shërben për statistika dhe renditje ndërkombëtare, duke qenë se ekipet e tjera në botë do të luajnë dy ndeshje gjatë së njëjtës dritare ndërkombëtare.
Ky rregull është kritikuar nga disa ekipe, pasi pjesëmarrësit shpesh do të jenë të pamotivuar pas zhgënjimit nga eliminimi, por FIFA ka vendosur që ndeshja të zhvillohet pa përjashtime.