E ftuar në emisionin “Mam” me Orinda Hutën, aktorja shqiptare Ana Lika ka ndarë një rrëfim të ndjeshëm dhe të sinqertë mbi sfidat që ka përjetuar pas humbjes së nënës së saj. Ajo zbuloi se pas kësaj humbjeje, është diagnostikuar me epilepsi – një sëmundje që ka zgjedhur ta mbajë të fshehur për një kohë të gjatë.
“U përballa me krizën e parë gjatë vizitës për kontrollin e parë të shtatzënisë. Isha vetëm dhe ndihesha e brishtë. Kisha frikë ta pranoja publikisht sëmundjen, jo sepse më vinte keq për veten, por sepse nuk doja që vajza ime të kishte një nënë të dobët,” – rrëfeu Ana me emocione.
Për shkak të trajtimit me medikamente, ajo mori vendimin e vështirë për të mos e ushqyer vajzën me gji – një zgjedhje e dhimbshme por e domosdoshme për shëndetin e saj.
Aktorja foli edhe për mbështetjen e partnerit të saj, Bjordit, duke e cilësuar si “shtyllën” që e ka ndihmuar të përballojë çdo sfidë. “E kam pyetur nëse donte të rrinte me mua. Doja të dija nëse isha barrë për të. Por ai më tregoi çdo ditë se jo vetëm nuk isha barrë, por që ishim të pandarë,” – tha Ana me përulësi.