Mbretëria e Bashkuar ka shpallur njohjen zyrtare të shtetit të Palestinës, duke iu bashkuar Kanadasë dhe Australisë në një nismë të përbashkët ndërkombëtare që synon të rigjallërojë shpresën për paqe në Lindjen e Mesme.
Kryeministri britanik, Keir Starmer, deklaroi se ky hap është i domosdoshëm për të avancuar zgjidhjen me dy shtete.
“Sot, për të rikthyer shpresën për paqe për palestinezët dhe izraelitët, Mbretëria e Bashkuar njeh zyrtarisht Shtetin e Palestinës,” theksoi ai.
Më herët gjatë javës, edhe kryeministri kanadez, Mark Carney, shpalli njohjen e Palestinës si shtet sovran, duke u zotuar për partneritet në ndërtimin e një të ardhmeje të qetë. Po ashtu, kryeministri australian, Anthony Albanese, e cilësoi këtë si një angazhim të përbashkët për paqe të qëndrueshme.
Këto tre shtete – Britania, Kanadaja dhe Australia – janë të parat nga grupi i G7 që ndërmarrin hapin historik të njohjes së Palestinës. Vendimet u bënë publike gjatë punimeve të Asamblesë së Përgjithshme të OKB-së në Nju Jork.
Vendimi britanik vjen pasi Starmer paralajmëroi më 29 korrik se Londra do të njihte Palestinën nëse Izraeli nuk do të ndërmerrte hapa konkretë për armëpushim dhe përmirësim të situatës humanitare në Gaza. Në javët e fundit, kriza atje është përkeqësuar, me ofensiva të reja izraelite dhe raporte për uri ekstreme të konfirmuara nga agjencitë ndërkombëtare.
Ky bashkëpunim i tre vendeve pritet të shtojë presionin mbi komunitetin ndërkombëtar për hapa konkretë drejt një procesi paqeje dhe njohjes së të drejtave legjitime të popullit palestinez.