Një mësuese fizike në Glasgou, Kirsty Buchan, është përjashtuar nga arsimi pas zbulimit të një profili të saj në platformën OnlyFans, ku postonte përmbajtje për të rritur nën pseudonimin “Jessica Jackrabbit x”.
Buchan, 34 vjeç, dikur vetë nxënëse në Shkollën e Mesme Bannerman, u shpall në shkelje të etikës nga Këshilli i Përgjithshëm i Mësimdhënies për Skocinë. Sipas vendimit, ajo kishte dështuar të mbante një kufi të qartë mes jetës profesionale dhe asaj private, duke kompromentuar imazhin e sistemit arsimor.
Në një deklaratë publike, Buchan theksoi se ishte detyruar të kërkonte të ardhura shtesë për shkak të pagës së ulët si mësuese:
“Nuk doja të lija profesionin tim, por më duhej të fitoja më shumë. Kam punuar edhe në dy punë të tjera përpara OnlyFans.”
Ajo zbuloi se profili i saj i ka sjellë deri në 50,000 paund në muaj dhe ka qenë aktiv për më shumë se tre vjet. Pavarësisht se përmbajtja nuk u shpërnda nga ajo në ambientet e shkollës, imazhet u përhapën ilegalisht mes nxënësve, çka çoi në përjashtimin e saj.
Ngjarja ka ndezur sërish debatin për kufijtë e jetës private të mësuesve dhe për moralin që u kërkohet figurave publike në edukim — në një kohë kur të ardhurat nga profesionet tradicionale shpesh nuk mjaftojnë për një jetë të qëndrueshme.