Gjykata Themelore në Prishtinë ka caktuar një muaj paraburgim për T.K., të dyshuar për vrasjen e rëndë të 41-vjeçarit Enver Bajraktari, ngjarje e ndodhur mes 3 dhe 4 gushtit në fshatin Baicë, Lipjan.
Sipas Prokurorisë, konflikti i mëparshëm mes palëve përfundoi në mënyrë makabre: viktima u godit me mjete të forta në kokë e trup, u ngulfat dhe u tërhoq zvarrë deri në një arë misri, ku autorët – ende jo të gjithë të identifikuar – hapën një gropë mbi një metër të thellë, vendosën trupin, e mbuluan me dërrasa e dhe, dhe më pas rivendosën rrënjët e misrit për të fshehur gjurmët.
Familjarët e gjetën trupin e tij të groposur më 4 gusht rreth orës 12:10, pas kërkimeve në fshat. Gjykata argumentoi se lënia në liri e të dyshuarit paraqet rrezik për arratisje, ndikim tek dëshmitarët dhe mundësi të kryerjes së veprave të tjera, duke marrë parasysh edhe të kaluarën e tij kriminale, përfshirë një vendim të mëparshëm gjyqësor ku viktimë dyshohet se ka qenë po Bajraktari.
Palët kanë të drejtë ankese në Gjykatën e Apelit.