Një kamarier në zonën e Skelës në Vlorë ka rënë pre e një dhune të ushtruar nga një efektiv policie jashtë detyrës dhe një personi i dyshuar me një të kaluar të theksuar kriminale.
Në pamjet e publikuara në rrjete sociale, të fiksuara nga kamera e sigurisë së lokalit, shihet momenti kur dy persona i afrohen kamarierit dhe ky i fundit përpiqet t’i qetësojë.
Ishte fillimisht efektivi Ardian Isufi, ish-shef i qarkullimit të Vlorës ai që i afrohet të riut në tentativë për ta goditur, ndërsa më pas vjen Leart Bino dhe e godet disa herë. Kamarieri i dhunuar për shkak të detyrës është larguar pasi pasojat mund të ishin fatale për t’i shpëtuar një sulmi tjetër pasi dhunuesit po i afroheshin përsëri.
Episodi ka ndodhur në një kohë kur lokali ishte i mbushur me klientë dhe ngjarja është parë nga dhjetëra persona, të cilët janë tmerruar nga akti.
Në një tjetër video të shfaqur në rrjet, i riu sqaron të gjithë ngjarjen. Ai pretendon se ishte bërë një gabim në porosi dhe në tavolinën e dy burrave ishte dërguar një ujë më tepër nga se ishte porositur. Kjo ka acaruar burrat që më pas ndërmorën dhe aktin. “Për një shishe ujë goditën një djalë që sapo i ka mbushur 18 vjeç”, shprehet ndër të tjera i riu.