Partia Demokratike ka vendosur të nisë zyrtarisht procedurën parlamentare për shkarkimin nga detyra të Presidentit të Republikës, Bajram Begaj. Vendimi është marrë në mbledhjen e sotme të grupit parlamentar, dhe bazohet në nenin 90, pika 2 e Kushtetutës së Republikës së Shqipërisë.
Në njoftimin për shtyp, PD thekson se Presidenti Begaj ka kryer “shkelje të rëndë të Kushtetutës”, çka sipas saj, përbën bazë ligjore për ndërmarrjen e kësaj procedure të jashtëzakonshme.
“Grupi Parlamentar i Partisë Demokratike ka marrë vendimin për të propozuar shkarkimin e Presidentit të Republikës, në përputhje me dispozitat kushtetuese,” thuhet në deklaratë.
PD nuk ka dhënë ende detaje të hollësishme mbi shkeljet konkrete që i atribuon Presidentit Begaj, por pritet që këto të paraqiten gjatë procedurave parlamentare që do të pasojnë.
Kjo është hera e parë gjatë mandatit të Bajram Begajt që një forcë politike ndërmerr një nismë për shkarkimin e tij nga detyra.