Për ditën e diel, vendi ynë do të ndikohet nga kushte atmosferike të paqëndrueshme. Moti do të nisë me vranësira të dendura, ndërsa nga orët e paradites deri në pasdite priten alternime kthjellimesh dhe vranësirash. Në mbrëmje, vranësirat do të shtohen sërish në të gjithë territorin.
Reshjet e shiut do të jenë të pranishme që në orët e para të ditës deri në mëngjes, me intensitet të ulët në pjesën më të madhe të vendit. Gjatë ditës, shiu do të mbetet i dobët dhe i lokalizuar kryesisht në ekstremin verior dhe jugor. Në orët e vona të mbrëmjes, reshjet do të përfshijnë të gjithë vendin, me intensitet të ulët, ndërsa përgjatë vijës bregdetare dhe ultësirës perëndimore pritet intensitet deri mesatar.
Në zonën e Alpeve dhe në relievet malore të verilindjes dhe juglindjes parashikohen reshje dëbore me intensitet të ulët. Era do të fryjë nga drejtimi jug – juglindje me shpejtësi mesatare 10 m/s, ndërsa në zonat bregdetare dhe luginore do të arrijë deri në 22 m/s. Deti do të jetë i trazuar, me valëzim nga forca 4 deri në 6 ballë.