Gjykata e Tiranës ka shpallur aktoren Egla Ceno fajtare për shpifje pas akuzave publike që ajo kishte bërë ndaj moderatorit Saimir Kodra, të cilin e kishte akuzuar për ngacmim seksual.
Në vendimin e Dhoma Penale të Gjykatës së Shkallës së Parë të Juridiksionit të Përgjithshëm, Saimir Kodra rezultoi i pafajshëm, ndërsa Ceno u dënua me detyrimin për të publikuar vendimin gjyqësor brenda 15 ditëve, duke mbuluar dhe shpenzimet e saj.
Pas shqyrtimit të të gjitha provave dhe dëgjimit të palëve, gjykata pushon akuzën për “Fyerje” në ngarkim të Cenos, por e shpall fajtore për “Shpifje” në dëm të Kodrës.
Publikimi i vendimit duhet të bëhet plotësisht dhe të qëndrojë tri ditë në Gazetën Panorama, në versionin print dhe online.
NJOFTIM PËR SHTYP
Referuar interesit të shfaqur nga disa gazetarë, komunikohet informacioni zyrtar në vijim:
Gjykata e Shkallës së Parë të Juridiksionit të Përgjithshëm Tiranë, Dhoma Penale, pasi ka mbyllur shqyrtimin gjyqësor të kërkesës penale me palë: viktimë akuzuese S.K., e akuzuar E.C. ka shqyrtuar dhe vlerësuar të gjitha aktet dhe provat të administruara në kuadër të këtij gjykimi penal, ka dëgjuar palët në pretendimet e tyre përfundimtare, në emër të Republikës,
VENDOSI :
Pushimin e akuzës për kryerjen e veprës penale të “Fyerja”, parashikuar nga neni 119/2 i K.Penal, në ngarkim të të akuzuarës E. C., pasi ndjekja penale për këtë vepër nuk mund të vazhdojë në referencë të nenit 328, pika 1, gërma ‘d’ dhe 387 të K.Pr.Penale.
Deklarimin fajtor të të akuzuarës E. C., për veprën penale të “Shpifja” e parashikuar nga neni 120/2 i K.Penal, në dëm të viktimës akuzuese Saimir Kodra dhe në bazë të neneve 30, paragrafi II dhe 43 të K.Penal, dënimin e saj me dënimin plotësues për publikimin e vendimit gjyqësor.
Publikimi i vendimit gjyqësor do të bëhet nga e akuzuara E. C., me shpenzimet e saj brenda 15 ditëve nga dita që vendimi merr formë të prerë.
Publikimi i vendimit do të bëhet tërësisht dhe do të qendrojë për tri ditë në Gazetën “Panorama”, në versionin print dhe online të saj.
Shpenzimet gjyqësore në ngarkim të të akuzuarës.
Kundër vendimit lejohet ankim brenda 15 (pesëmbëdhjetë) ditëve nga dita e njoftimit të këtij vendimi në Gjykatën e Apelit të Juridiksionit të Përgjithshëm.
U shpall sot në Tiranë, me datë 21.10.2025.