Një zhvillim i ri tronditës është zbuluar në lidhje me ngjarjen e rëndë në Pogradec.
Nga një foto e siguruar nëpërmjet burimeve aludohet për një lidhje të dyshimtë midis burrit të prokurores së çështjes Vasjana Postol dhe njërit prej avokatëve mbrojtës të të akuzuarve në rastin e vrasjes së Egli Progës.
Në foton e siguruar, Ervin Xhihani, bashkëshorti i prokurores Vasjana Postol, shihet duke drekuar me avokatin Budjon Hoxha që po mbron njërin prej bashkëpunëtorëve të vrasësit, i cili është akuzuar për vrasjen brutale të Egli Progës.
Sipas burimeve, të dy janë shokë të ngushtë prej shumë vitesh. Si rrjedhojë kjo foto ka ngritur dyshime të forta për integritetin e procesit gjyqësor dhe pavarësinë e hetimeve.
Kujtojmë se, prokurorja e çështjes Vasjana Postol zbuti akuzën ndaj Denis Meçes.
Ndërsa policia e kishte referuar ngjarjen si një vrasje me dashje – një akuzë që do të dënohej me 10 deri në 20 vjet burg – Postol e riformuloi veprën penale si “vrasje nga pakujdesia.” Kjo akuzë është shumë më e lehtë dhe dënohet me gjobë ose burgim deri në 5 vjet.
Gjithashtu kërkoi “detyrim paraqitje” për 3 të tjerët me akuzën për moskallëzim krimi; Voltan Shulkun, 40 vjeç, Arian Manellarin 55 vjeç, dhe Leonidha Guçen, 47 vjeç.
Voltan Shulku është pronari i lokalit ku ka ndodhur dhunimi i Egli Progës.
Budjon Hoxha që shfaqet në foto me burrin e prokurores, është avokati mbrojtës i Voltan Shulkut.