TIRANË– Luiz Ejlli është në qendër të vëmendjes pasi fansat dhe mediat kanë komentuar për një rikthim të mundshëm të tij në ekran.
Gjatë një interviste për mediat në Kosovë, Luizi është pyetur drejtpërdrejt nëse do të marrë rolin e kryeplakut në edicionin e ri të Ferma VIP, i cili, sipas zërave, pritet të prezantohet nga Arbana Osmani.
Pa dhënë një përgjigje të prerë, fituesi i “Big Brother VIP Albania” zgjodhi të ruajë misterin, duke lënë të kuptohet se është në prag të një projekti të ri televiziv, por pa konfirmuar nëse bëhet fjalë pikërisht për “Ferma VIP”.
“Thonë ku ka zë, nuk është pa gjë. Ka pasur oferta. Por unë kam qejf me një lëvizje që do bëj… duroni dhe pak ditë.”- u shpreh Luizi, duke shtuar se shumë shpejt gjithçka do të bëhet e qartë. Ai theksoi se preferon që përgjigjen ta japë përmes një veprimi konkret, e jo me fjalë.
“Me një lëvizje që do bëj, do e marrin përgjigjen të gjithë. Duroni edhe pak, diku 10 ditë.”- tha ai, duke nxitur edhe më shumë kureshtjen e publikut.
Luizi shtoi gjithashtu se për të, përfoljet janë pjesë e lojës mediatike. “Gjëja më e mirë është me u përfolur, por do jem diçka. Se ku… nuk e di.”- u shpreh ai me humor, duke lënë të hapur çdo mundësi.
Deklarata e tij ka mjaftuar që rrjetet sociale të shpërthejnë në komente dhe hamendësime, ndërsa mbetet për t’u parë nëse Luizi do të shfaqet si kryeplak në “Ferma VIP” apo do të surprizojë publikun me një projekt tjetër televiziv./Radar.al