Kandidati për deputet i Partisë Demokratike, Asllan Dogjani, ka kritikuar ashpër procesin e rinumërimit të votave, duke akuzuar Komisionin e Ankimimeve dhe Sanksioneve (KAS) për manipulim dhe standarde të dyfishta. Në një intervistë për News24, Dogjani shpjegoi përplasjen që pati me anëtarin e KAS, Ilir Rusmali, të cilin e akuzoi për ndikim politik dhe përpjekje për tjetërsimin e vullnetit qytetar.
Sipas Dogjanit, qindra vota të vlefshme për PD-në, përfshirë rreth 300 vota në favor të tij personalisht, u shpallën të pavlefshme në mënyrë të padrejtë dhe të qëllimshme. Ai tha se vendimet e KAS nuk janë gabime teknike, por pjesë e një skeme të organizuar që synon t’i mohojë votuesve të drejtën e tyre.
“7,900 qytetarë më besuan votën, dhe unë po luftoj që çdo votë të shkojë aty ku është hedhur. Kjo që po ndodh është vjedhje, është hajdutëri,” u shpreh Dogjani, duke kërkuar që çështja të dërgohet në Kolegjin Zgjedhor për një vendim më të drejtë.
Ai theksoi se edhe pse ka dyshime se nuk do të hyjë në parlament, betejën e tij e bën për integritetin e procesit zgjedhor dhe respektin ndaj qytetarëve që e votuan. “KAS po bën veprime me dy standarde dhe unë dyshoj se prapa këtyre vendimeve qëndron ndikimi i Edi Ramës,” përfundoi Dogjani.