Shërbimet elektronike në portalin qeveritar e-Albania nuk do të jenë më plotësisht falas. Këshilli i Ministrave ka miratuar sot një vendim të ri, i cili përcakton tarifat që do të aplikohen për disa nga dokumentet dhe veprimet më të përdorura në platformë. Vendimi hyn në fuqi pas botimit në Fletoren Zyrtare.
Sipas dokumentit zyrtar, bizneset dhe qytetarët do të paguajnë tarifa specifike për nënshkrimin elektronik, vulën elektronike, certifikatat për fiskalizim dhe transaksionet në platformën qeveritare të ndërveprimit (GG).
Tarifat për bizneset
Për subjektet private, janë miratuar këto çmime:
4 800 lekë (me TVSH) për nënshkrimin elektronik, me vlefshmëri 1 vit;
20 lekë (me TVSH) për vulosjen e dokumenteve me vulë elektronike, për çdo transaksion;
4 000 lekë (me TVSH) për certifikatën elektronike për projektin e fiskalizimit, me vlefshmëri 1 vit;
15 lekë (me TVSH) për çdo transaksion në platformën qeveritare të ndërveprimit (GG).
Tarifat për qytetarët
Për shtetasit shqiptarë dhe të huaj, nënshkrimi elektronik do të kushtojë 2 000 lekë në vit.
Nëpunësit e administratës publike që punojnë në institucione me vetëfinancim do të paguajnë të njëjtën tarifë me bizneset – 4 800 lekë për një vit.
Si do të kryhen pagesat
Tarifat do të paguhet elektronikisht në momentin e aplikimit në portalin qeveritar.
Pagesat për nënshkrimin elektronik dhe certifikatën e fiskalizimit do të kryhen kur merret shërbimi.
Ndërsa pagesat për vulën elektronike dhe transaksionet në platformën GG do të realizohen çdo muaj, në varësi të numrit të shërbimeve të kryera.
Të gjitha të ardhurat e mbledhura nga këto tarifa do të derdhen 100% në buxhetin e shtetit.
Përjashtimet
Institucionet dhe organet e administratës publike nuk do të paguajnë për asnjë nga këto shërbime — ato do të kenë tarifë zero për nënshkrim, vulë apo certifikata elektronike.
Vendimi i ri shfuqizon atë të datës 22 janar 2020, që parashikonte tarifat e mëparshme të Agjencisë Kombëtare të Shoqërisë së Informacionit (AKSHI). Zbatimin e rregullores së re do ta kryejë vetë AKSHI, nën mbikëqyrjen e Këshillit të Ministrave.
VENDIMI I KËSHILLIT TË MINISTRAVE:
Në mbështetje të nenit 100 të Kushtetutës dhe të pikës 2, të nenit 36, të ligjit nr.43/2023, “Për qeverisjen elektronike”, të ndryshuar, me propozimin e Kryeministrit, Këshilli i Ministrave
V E N D O S I:
1. Shërbimet elektronike, në favor të organeve dhe të institucioneve të administratës publike, subjekteve private dhe qytetarëve, ofrohen nga Agjencia Kombëtare e Shoqërisë së Informacionit, kundrejt aplikimit të tarifave përkatëse.
2. Për organet dhe institucionet e administratës publike, shërbimet elektronike për nënshkrim elektronik, vulë elektronike, certifikatë elektronike për projektin e fiskalizimit, vulë kohore, transaksion në platformën qeveritare të ndërveprimit (GG) ofrohen nga Agjencia Kombëtare e Shoqërisë së Informacionit, me tarifën zero lek.
3. Për subjektet private, shërbimet elektronike për nënshkrim elektronik, vulë elektronike, certifikatë elektronike për projektin e fiskalizimit, transaksion në platformën qeveritare të ndërveprimit (GG) ofrohen nga Agjencia Kombëtare e Shoqërisë së Informacionit me tarifat, si më poshtë vijon:
a) 4 800 (katër mijë e tetëqind) lekë, përfshirë TVSH-në, për nënshkrimin elektronik, me afat vlefshmërie 1 (një) vit;
b) 20 (njëzet) lekë, përfshirë TVSH-në, për shërbimin e vulosjes së dokumenteve me vulë elektronike/për transaksion;
c) 4 000 (katër mijë) lekë, përfshirë TVSH-në, për certifikata elektronike për projektin e fiskalizimit, me afat vlefshmërie 1 (një) vit;
ç) 15 (pesëmbëdhjetë) lekë, përfshirë TVSH-në, për transaksion në platformën qeveritare të ndërveprimit (GG).
4. Për shtetasit shqiptarë dhe shtetasit e huaj, shërbimi i nënshkrimit elektronik ofrohet nga Agjencia Kombëtare e Shoqërisë së Informacionit, me tarifën 2 000 (dy mijë) lekë, me afat vlefshmërie 1 (një) vit.
5. Për nëpunësit e administratës në institucionet publike me vetëfinancim, shërbimi i nënshkrimit elektronik ofrohet nga Agjencia Kombëtare e Shoqërisë së Informacionit, me tarifën 4 800 (katër mijë e tetëqind) lekë, me afat vlefshmërie 1 (një) vit.
6. Pagesa e tarifave të përcaktuara në këtë vendim kryhet në momentin e aplikimit on-line për kryerjen e veprimeve dhe të procedurave, nëpërmjet pagesës elektronike në portalin qeveritar “e-Albania”.
7. Pagesat e tarifave, të përcaktuara në shkronjat “a” e “c”, të pikës 3, dhe të pikave 4 e 5, të këtij vendimi, realizohen në marrje të çdo shërbimi elektronik.
8. Pagesat e tarifave, të përcaktuara në shkronjat “b” e “ç”, të pikës 3, të këtij vendimi, realizohen periodikisht çdo muaj për numrin e transaksioneve të kryera gjatë asaj periudhe on-line nëpërmjet portalit qeveritar “e-Albania”, si dhe kryerja e tyre shihet në kohë reale.
9. Të ardhurat e realizuara derdhen 100% në buxhetin e shtetit, në përputhje me vendimin nr.432, datë 28.6.2006, të Këshillit të Ministrave, “Për krijimin dhe administrimin e të ardhurave, që krijohen nga institucionet buxhetore”.
10. Vendimi nr.35, datë 22.1.2020, i Këshillit të Ministrave, “Për miratimin e tarifave për shërbimet elektronike të Agjencisë Kombëtare të Shoqërisë së Informacionit”, shfuqizohet.
11. Ngarkohet Agjencia Kombëtare e Shoqërisë së Informacionit për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA