Si rezultat i kontrolleve të shtuara dhe punës intensive operative për kapjen e personave të përfshirë në veprimtari kriminale, shërbimet e Komisariateve të Policisë Nr. 6 dhe Nr. 3, në kuadër të operacionit “Lista” dhe në vijim të operacionit “Reaction”, kanë arrestuar shtetasin G. L., 35 vjeç, banues në Tiranë, me precedent të mëparshëm penal në fushën e vjedhjeve.
Sipas policisë, 35-vjeçari dyshohet se më datë 14 dhjetor 2025, në bashkëpunim me shtetasin M. A., i cili është arrestuar më herët, dhe me shtetasin E. H., aktualisht në kërkim, ka dhunuar një shitës në një subjekt tregtar, me qëllim marrjen e një shume parash.
Nga hetimet rezulton gjithashtu se më 26 dhjetor 2025, G. L. ka kryer një tjetër vjedhje në një subjekt tjetër tregtar.
Policia bën me dije se vijon puna për kapjen e bashkëpunëtorit të shpallur në kërkim, si dhe për dokumentimin e rasteve të tjera të vjedhjeve ku mund të jetë përfshirë 35-vjeçari.