Drejtori i Përgjithshëm i Policisë së Shtetit, Skënder Hita, ka reaguar lidhur me rastin e rëndë të dhunës në Fier, ku tre 17-vjeçare ushtruan dhunë ndaj bashkëmoshatares së tyre. Ai bëri të ditur se gjatë hetimeve ka rezultuar i përfshirë edhe një efektiv policie, i cili, sipas Policisë së Shtetit, ka pasur një marrëdhënie të papërshtatshme me vajzat e përfshira në ngjarje.
Hita tha se fillimisht ndaj punonjësit të policisë është marrë masa e pezullimit nga detyra, ndërsa këtë të enjte është vendosur edhe përjashtimi i tij nga radhët e Policisë së Shtetit.
Skënder Hita: “Kjo video që është transmetuar në rrjetet sociale është vërtet e rëndë, ku shihen disa të mitura që kryenin veprime të dhunshme ndaj një personi tjetër dhe për këtë arsye që më 9 qershor policia ka kryer veprimet procedurale dhe ka referuar rastin në Prokurori. Më pas, gjatë veprimeve hetimore që janë zhvilluar në vazhdimësi së bashku me Prokurorinë, ka vijuar ndjekja penale. Njëra nga gocat ka pasur rast të përsëritur dhune dhe është arrestuar në ditët në vijim, por hetimi nuk ka ndaluar këtu.
Me hetimin ka rezultuar i përfshirë edhe një punonjës policie më vonë, për të cilin kemi marrë masën e pezullimit nga detyra, ndërsa sot kemi marrë masën e përjashtimit për oficerin e policisë të përfshirë në veprime të pahijshme për një punonjës policie. Hetimet vazhdojnë dhe do të marrim të gjitha masat e nevojshme në bashkëpunim me Prokurorinë.”
Kreu i Policisë sqaroi gjithashtu se, sipas hetimeve të deritanishme, nuk ka rezultuar që efektivi të ketë shpërndarë videon e dhunës, por ai është ndëshkuar për cenim të rëndë të figurës së punonjësit të policisë.
Skënder Hita: “Nuk është evidentuar se ka nxjerrë videon, por pezullimi i tij është urdhëruar për shkelje të standardit dhe të cenimit të rëndë të figurës që ka bërë punonjësi i policisë në krye të detyrës, pasi ka hyrë në një marrëdhënie të panevojshme me vajzat që kanë kryer këtë veprim të kundërligjshëm ndaj të miturës tjetër.”