Nëse jeni në përpjekje për të lënë duhanin, përfshirja e disa ushqimeve të caktuara në dietën tuaj mund të ndihmojë trupin të eliminojë nikotinën më shpejt dhe të rikuperohet nga dëmet e shkaktuara.
Hithra konsiderohet një nga ushqimet më efektive për detoksifikim. E pasur me hekur, ajo ndihmon në pastrimin e organizmit dhe forcon sistemin imunitar, duke luftuar infeksionet dhe duke i dhënë trupit energjinë e nevojshme gjatë procesit të çlirimit nga nikotina.
Perimet si selinoja, kungulleshka, patëllxhani, fasulet dhe kastraveci ndihmojnë në uljen e varësisë nga nikotina. Ndërkohë, rekomandohet të shmanget konsumimi i tepërt i perimeve shumë të ëmbla, pasi sheqeri i lartë mund të stimulojë zonat e trurit që lidhen me kënaqësinë dhe të shtojë dëshirat ushqimore.
Portokajt janë të pasur me vitaminë C, e cila përshpejton metabolizmin, ndihmon në largimin e nikotinës dhe redukton stresin. Edhe kivi është shumë i dobishëm, pasi ndihmon në eliminimin e nikotinës dhe rikthen nivelet e vitaminave A, C dhe E, të cilat reduktohen nga pirja e duhanit.
Lëngu i karrotës përmban vitamina A, B, C dhe K, të cilat ndihmojnë në pastrimin e organizmit nga nikotina dhe në përmirësimin e shëndetit të lëkurës, e cila dëmtohet ndjeshëm nga duhani.
Brokoli është i pasur me vitamina B5 dhe C, që forcojnë trupin dhe ndihmojnë në mbrojtjen e mushkërive nga dëmtimet e shkaktuara nga toksinat. Ai përmban gjithashtu substanca që mbështesin shëndetin e sistemit respirator.
Spinaqi, i pasur me vitamina dhe acid folik, ndihmon në rigjenerimin e organizmit dhe në eliminimin e mbetjeve toksike, përfshirë nikotinën.