Mot i keq dhe det i trazuar në Durrës! Një rimorkiator ka përfunduar në breg të plazhit, mes zonave të Agipit dhe Teutës, si pasojë e dallgëve të fuqishme dhe erës së fortë që fryn nga jugperëndimi.
Në bord ndodheshin dy persona, të cilët fatmirësisht janë jashtë rrezikut për jetën. Mjeti lundrues, që ndodhej në radhë, u përfshi nga rrymat e fuqishme dhe ekuipazhi nuk mundi të kryente manovrat për ta mbajtur nën kontroll.
Sipas Kapitanerisë së Portit të Durrësit, situata po monitorohet nga afër. Për shkak të errësirës dhe kushteve të pafavorshme detare, rimorkiatori do të rikthehet në det vetëm kur të sigurohen kushtet e nevojshme për ndërhyrje.