Në afërsi të fshatit Vrinë ka ndodhur një aksident i rëndë.
Një makinë që vinte nga Greqia me dy shtetas të huaj, ka përfunduar në kanalin e Butrintit.
Drejtuesi i mjetit duket se nuk e ka parë kthesën që të çon në vendin e quajtur “Lundra” dhe ka përfunduar në kanal. Banorët e zonës që kanë parë skenën janë hedhur menjëherë në ujë duke nxjerrë nga automjeti që po fundosej një çift të huajsh.
Ata u kanë dhënë ndihmën e parë duke i nxjerrë nga uji deri sa ka mbërritur infermierja e zonës, Liljana Rumank, që u ka dhënë ndihmën e parë mjekësore.
Infermierja ka konstatuar se mashkulli kishte parametra të ulët jetësorë ndërsa shoqëruesja e tij paraqitej në gjendje më të mirë.
Në vendngjarje ka mbërritur policia dhe autoambulanca të cilët i kanë transportuar drejt Spitalit të Sarandës dy të lënduarit.
Ata janë identifikuar si Onno J Van Helden 53 vjeç nga Holanda dhe Dajana Murai 34 vjeç nga Brazili. Gjendja e 53-vjeçarit paraqitet kritike ndërsa e 34-vjeçares më e stabilizuar.
Megjithatë ata do të nisen me autoambulancë drejt Tiranës për mjekim më të specializuar.