Një incident i rëndë është regjistruar sot në Lubjanë, ku deputeti i Partisë Demokratike Sllovene (SDS), Andrej Hoivik, është ngjitur në kulmin e ndërtesës së parlamentit duke kërcënuar me vetëvrasje.
Mediat sllovene raportojnë se menjëherë në vendngjarje mbërritën forcat e policisë, zjarrfikësit dhe ambulanca. Falë ndërhyrjes së shpejtë të zjarrfikësve, Hoivik pranoi të zbriste dhe iu dorëzua personelit mjekësor pa lëndime.
Në një deklaratë të shkurtër, Hoivik tha se nuk akuzon askënd për gjendjen në të cilën ndodhet, as kryeministrin Robert Golob, por shtoi: “Ajo që po bëhet në këtë vend nuk është e drejtë.”
— Uroš Petohleb (@UrosPetohleb) May 16, 2025
Policia e ka klasifikuar ngjarjen si ndërhyrje emergjente për një person në krizë psikologjike, ndërsa motivet zyrtare mbeten të paqarta. Sipas burimeve jozyrtare, deputeti kishte shfaqur shenja të lodhjes dhe rraskapitjes emocionale gjatë javëve të fundit.
Partia Demokratike Sllovene në rrjete sociale tha se “sprovat që na sjell jeta ndonjëherë janë shumë të vështira. Ne kërkojmë nga të gjithë mirëkuptim dhe dhembshuri. Faleminderit!”.