Një ngjarje e pazakontë ka tronditur opinionin publik në Kurbin, ku qytetari Aleks Dalipi denoncoi në emisionin investigativ Fiks Fare se është kërcënuar me armë nga Markelian Hoti, vëllai i deputetes së Partisë Demokratike, Elda Hoti. Por, në vend që të merrej në mbrojtje apo të hetohej kallëzimi i tij, vetë Dalipi përfundoi në pranga.
Sipas Dalipit, ngjarja më e fundit ka ndodhur më 4 prill 2025 në qytetin e Laçit, në zonën pranë Pallatit të Kulturës. Ai pretendon se, teksa ishte me makinë, u ndalua nga disa persona të lidhur me shtabin elektoral të deputetes Hoti, ku njëri prej tyre, Markelian Hoti, ka nxjerrë armën dhe e ka kanosur. Ai ka njoftuar menjëherë policinë, por sipas tij, forcat nuk kanë reaguar në kohë.
Kjo nuk është hera e parë që qytetari ngre akuza ndaj vëllait të deputetes. Në vitin 2021, Dalipi ka kallëzuar se ishte qëlluar me armë nga i njëjti person në Milot, por edhe kjo çështje u pushua për mungesë provash, ndërsa ekspertiza për gjurmë baruti iu bë babait të autorit të dyshuar, dhe jo vetë Markelianit.
Dalipi thotë se është përballur me presion të vazhdueshëm dhe mungesë veprimi nga institucionet ligjzbatuese. Më shqetësues është fakti që pas denoncimit të ngjarjes së 4 prillit, ai është shpallur në kërkim dhe më 23 prill është arrestuar për “kanosje” dhe “kundërshtim të punonjësit të policisë”. Ndërkohë, Markelian Hoti po hetohet në gjendje të lirë.
Policia dhe Prokuroria e Lezhës nuk kanë bërë publik asnjë informacion për hetimin ndaj vëllait të deputetes, ndërsa nuk dihet nëse janë sekuestruar pamjet filmike të kamerave të sigurisë që ndodhen në vendin ku ndodhi ngjarja.
Vetë deputetja Elda Hoti, në një prononcim telefonik për Fiks Fare, mohoi çdo përfshirje dhe e cilësoi denoncuesin si “prishës të fushatës”.
Ky rast ka ngritur pikëpyetje të mëdha mbi funksionimin e drejtësisë dhe pavarësinë e institucioneve hetimore në vend, veçanërisht kur palët e përfshira janë të lidhura me politikën.