PD ka denoncuar sot kryebashkiakun e arrestuar të Tropojës, Rexh Byberin, se edhe pse ndodhet nën masën e sigurisë “arrest në shtëpi”, ka kthyer një bar-kafe në ‘zyrë’ ku firmos dokumente të ndryshme.
“Pasi iu komunikua masa e sigurisë ‘arrest shtëpie’, Z. Byberi duke uzurpuar kompetencat e Këshillit Bashkiak si i vetmi organ i cili kryen komandimet në detyrë në rast vakance të kryetarit, Byberi komandoi në detyrën e kryetarit të Bashkisë Tropojë, zëvendëskryetaren, znj. Zyra Islamja.
Qytetarët denoncojnë gjithashtu, se pas vendosjes së masës së sigurisë, Rexh Byberi ka kthyer një bar-kafe në zyrë ku firmos e plotëson shkresa e dokumente.”, tha zëdhënësja e Anti-korrupsionit në Partinë Demokratike, Genta Vangjeli.
Sot Zyra Ismalaj është zgjedhur kryetare e komanduar e Bashkisë Tropojë, pasi për Rexhë Byberin u la në fuqi masa e sigurisë arrest shtëpie.
Prokuroria e Posaçme (SPAK) ka lëshuar masën e sigurisë “Arrest në shtëpi” për kryebashkiakun socialist të Tropojës, Rexhë Byberi, masë e cila është firmosur nga GJKKO.
E njëjta masë sigurie është caktuar edhe për nënkryetarin e Bashkisë së Tropojës, Abedin Kërnaja, teksa akuzohen për kryerjen e veprës penale “Shpërdorimi i detyrës”, e kryer në bashkëpunim.
Ata akuzohen për hapjen e rrugës së re “Stacioni i Anijes Palç- Guri i Lules”, ku sipas SPAK, punimet janë bërë në kundërshtim me aktet ligjore dhe nënligjore, të miratuara me vendim të Këshillit Bashkiak dhe prefektit të Qarkut Kukës.