Dy persona janë dënuar nga një gjykatë në Romë pasi u shpallën fajtorë për përpjekje për krijimin dhe organizimin e një strukture të frymëzuar nga ideologjia naziste, si dhe për aktivitete rekrutimi përmes internetit dhe rrjeteve sociale.
Sipas vendimit të Gjykatës së Seksionit të Parë për Krime të Rënda, Alessio Sabelli u dënua me 5 vjet e 6 muaj burg, ndërsa Louis Kant Restauri me 3 vjet e 6 muaj burg. Të dy u gjetën fajtorë për komplot me qëllime terroriste, përfshirë veprime që synonin cenimin e rendit demokratik dhe zhvillimin e aktiviteteve me shtrirje ndërkombëtare.
Nga hetimet rezultoi se Sabelli, i njohur me nofkën “Cesare”, kishte themeluar një organizatë paraushtarake të quajtur UFI (Unione Forze Identitarie). Autoritetet e përshkruan këtë grup si një strukturë me orientim neonazist, ksenofob dhe antisemit, e cila promovonte propagandë që mohonte Holokaustin dhe nxiste urrejtje ndaj pakicave etnike, emigrantëve dhe grupeve të tjera shoqërore.
Ndërkohë, gjykata vendosi të lirojë nga akuzat dy të pandehur të tjerë të përfshirë në proces. Gjithashtu, Ministrisë së Brendshme të Italisë iu njoh e drejta për një dëmshpërblim prej rreth 50 mijë eurosh, në cilësinë e palës civile në çështje.
Në kuadër të të njëjtit hetim, disa persona të tjerë kanë pranuar fajësinë përmes marrëveshjeve me prokurorinë, duke përfituar dënime më të ulëta, që variojnë nga një vit e dhjetë muaj deri në dy vite burg.