Ministri i Drejtësisë, Ulsi Manja, prezantoi sot paketën e re të ndryshimeve në Kodin Penal, që synojnë mbrojtjen e territorit dhe mjedisit përmes rritjes së ndëshkimeve për veprat penale.
Për zjarrvëniet, përveç dispozitave ekzistuese, shtohen dënime më të ashpra nëse veprat kryhen pranë zonave të banuara, brenda zonave të mbrojtura, monumenteve të kulturës apo infrastrukturës kritike, duke shkuar deri në 20 vite burg.
Edhe për ndërtimet e paligjshme, parashikohen masa më të rënda, sidomos kur kryhen nga zyrtarë publikë ose në zona të mbrojtura, me burgim deri në 10 vite dhe ndalim ushtrimi funksionesh.
Sa i përket pushtimit të tokës, risia është kategorizimi i veprës si kundërvajtje penale edhe kur bëhet për qëllime banimi, duke parashikuar deri në 5 vite burg kur prek zona të mbrojtura apo trashëgimi kulturore.
Për shkatërrimin e pyjeve me zjarr, dënimet variojnë nga 5 deri në 20 vite, ndërsa në rastet kur zjarret lidhen me ndryshimin e destinacionit të tokës, gjykata do të ndalojë riklasifikimin e saj për 30 vjet.
Sipas Manjës, këto ndryshime synojnë të forcojnë mbrojtjen e mjedisit dhe të garantojnë që pasojat e rënda për territorin dhe komunitetin të mos mbeten më pa ndëshkim.