Demokratët në SHBA kanë akuzuar Departamenti Amerikan i Drejtësisë se po mban të fshehta dokumente që mund të përmbajnë akuza për abuzim seksual ndaj të miturve kundër Presidentit Donald Trump, në kuadër të çështjes së lidhur me financierin e ndjerë Jeffrey Epstein.
Akuza është bërë nga Robert Garcia, anëtar demokrat i Komitetit Mbikëqyrës në Dhomën e Përfaqësuesve, i cili po ndjek hetimet për rastin Epstein. Garcia ka deklaruar se ka parë dokumente që përmbajnë akuza të reja, të cilat sipas tij nuk janë bërë publike, duke lënë të kuptohet se Departamenti i Drejtësisë po i mban ato të fshehta.
Në reagimin zyrtar, Departamenti i Drejtësisë ka mohuar kategorikisht pretendimet, duke theksuar se “asgjë nuk është fshirë” dhe se dokumentet mbahen konfidenciale vetëm kur janë të privilegjuara ligjërisht ose pjesë e një hetimi në vijim.
Nga ana e tij, Trump ka mohuar çdo shkelje në lidhje me Epstein dhe është shprehur se është “plotësisht i liruar nga akuzat”. Shtëpia e Bardhë ka deklaruar se presidenti ka bashkëpunuar me hetimet dhe ka bërë më shumë për viktimat e Epstein se çdo administratë para tij, duke përmendur edhe nënshkrimin e një akti për transparencën e dosjeve.
Epstein, i dënuar më parë për krime seksuale, kishte pasur marrëdhënie shoqërore me Trump për vite me radhë, përpara se raportet mes tyre të ndërpriteshin në fillim të viteve 2000. Deri më tani, Departamenti i Drejtësisë ka publikuar miliona faqe dokumentesh nga hetimet për Epstein, megjithatë një pjesë e materialeve janë redaktuar ose mbajtur të klasifikuara për arsye hetimore.
Sipas raportimeve mediatike, disa intervista të zhvilluara nga FBI me një viktimë të dyshuar të Epstein mungojnë nga dosjet publike. Shënimet e këtyre intervistave, ku përfshihen edhe akuza ndaj Trump, nuk janë të disponueshme në materialet e publikuara, ndonëse sipas burimeve, pretendimet janë konsideruar të pabazuara.
Në një letër drejtuar Prokurores së Përgjithshme Pam Bondi, Garcia ka kërkuar transparencë të plotë dhe publikimin e çdo dokumenti që lidhet me akuzat, duke theksuar se hetimi duhet të jetë i hapur dhe i paanshëm. Nga ana tjetër, Departamenti i Drejtësisë ka akuzuar demokratët për përhapje dezinformatash me qëllim nxitjen e tensioneve politike.