Personi që shihni në foto është Altin Arapaj, 41 vjeç, i cili u ekzekutua me armë zjarri ditën e sotme në zonën bregdetare të Rafinës, në periferi të Athinës.
Sipas mediave greke, viktima u qëllua brenda një vreshti, ku një plumb e ka goditur drejtpërdrejt në fytyrë. Megjithatë, Arapaj ka arritur të telefonojë gruan e tij pak çaste pas të shtënave, duke i dhënë emrin e autorit të dyshuar.
Policia greke dyshon se vrasja është rezultat i një larjeje hesapesh, pasi si viktima, ashtu edhe autori dyshohet se kishin precedentë penalë. Altin Arapaj ishte i njohur për përfshirjen në veprimtari kriminale në Greqi, përfshirë trafikun e drogës dhe vepra të tjera penale.
Forcat policore kanë rrethuar zonën dhe janë në ndjekje të autorit, ndërsa hetimet janë intensifikuar për të dokumentuar plotësisht rrethanat e ngjarjes dhe për të verifikuar dëshminë e bashkëshortes, e cila mund të ketë çelësin e identifikimit të autorit.