Kryeministri në detyrë i Kosovës, Albin Kurti, ka reaguar ashpër ndaj deklaratave të presidentit serb, Aleksandar Vuçiç, pas arrestimit dhe paraburgimit për 30 ditë të zyrtarit serb Igor Popoviç në Kosovë. Kurti i ka cilësuar deklaratat e Vuçiçit si kërcënuese dhe destabilizuese, duke theksuar se ato nuk duhet të shpërfillen, pasi përbëjnë një rrezik për paqen dhe sigurinë në Ballkanin Perëndimor.
“Kur një president dhe njëkohësisht komandant i ushtrisë bën kërcënime publike me tone lufte, kjo nuk është thjesht deklaratë personale, por përfaqëson politikën shtetërore të Serbisë”, tha Kurti në një konferencë për media më 21 korrik.
Vuçiç kishte paralajmëruar Kosovën për “pasoja të paparashikueshme” pas arrestimit të Popoviçit, ndihmësdrejtor në Zyrën për Kosovën në Qeverinë e Serbisë, i cili akuzohet për “nxitje të përçarjes dhe mosdurimit” pas deklaratave ofenduese ndaj UÇK-së në një fjalim në Hoqë të Madhe.
Kurti u bëri thirrje institucioneve ndërkombëtare që të reagojnë me qartësi dhe vendosmëri ndaj këtyre deklaratave, ndërsa u kërkoi qytetarëve të Kosovës të shmangin udhëtimet përmes territorit serb, duke përmendur rrezikun e provokimeve dhe ndalimeve arbitrare nga autoritetet serbe.
“Ne nuk kemi frikë nga retorika e Vuçiçit. Jemi të përkushtuar të mbrojmë ligjin, rendin dhe demokracinë tonë,” shtoi Kurti.
Ndërkohë, Beogradi ka reaguar zyrtarisht duke kërkuar lirimin e menjëhershëm të Popoviçit dhe ka paralajmëruar hetime për “rrëmbim personi”, duke kërkuar identifikimin e zyrtarëve kosovarë që morën pjesë në arrestim. Autoritetet serbe kanë njoftuar edhe faktorët ndërkombëtarë për këtë çështje.
Ministri i Brendshëm në detyrë, Xhelal Sveçla, tha më herët se Kosova nuk do të lejojë fyerjen e historisë dhe luftës së UÇK-së, ndërsa strukturat e dala nga lufta janë shprehur hapur kundër pranisë së Popoviçit në territorin kosovar.
UÇK-ja ishte forca kryesore që luftoi për çlirimin e Kosovës gjatë viteve 1998-1999, periudhë në të cilën u vranë mbi 13 mijë civilë dhe më shumë se 1.600 persona – shumica shqiptarë – ende rezultojnë të zhdukur. Kurti theksoi se Serbia ende nuk ka kërkuar falje për krimet e kryera gjatë luftës.