Shtetet e Bashkuara të Amerikës kanë shpallur sot degët e “Vëllazërisë Myslimane” në Egjipt, Liban dhe Jordani si “organizata terroriste të huaj”, njoftoi sekretari amerikan i Shtetit, Marco Rubio.
Në deklaratën e tij, Rubio tha se ky vendim përbën një hap të rëndësishëm në përpjekjet e SHBA-së për të luftuar dhunën dhe destabilizimin për shkak të veprimtarisë së degëve të kësaj organizate.
“Shtetet e Bashkuara do të përdorin të gjitha mjetet e disponueshme për t’i privuar këto degë të ‘Vëllazërisë Myslimane’ nga burimet që mund t’i përdorin për të angazhuar ose mbështetur terrorizmin,” shkroi ai.
Presidenti Donald Trump kishte nënshkruar një urdhër ekzekutiv në nëntor që i hapi rrugë këtij procesi të shpalljes së degëve si organizata terroriste.
Në tekstin e publikuar nga Shtëpia e Bardhë, degët e “Vëllazërisë Myslimane” në tre vendet e përmendura përshkruheshin si struktura që “kryejnë, inkurajojnë ose mbështesin fushata dhune dhe aktorë që dëmtojnë rajonet e tyre, qytetarët amerikanë ose interesat amerikane”.
Përcaktimi si “organizatë terroriste e huaj” sjell edhe masa konkrete financiare e administrative, përfshirë: ngrirjen e aseteve në SHBA,
ndalimin e transaksioneve financiare, ndalimin e udhëtimeve në territorin amerikan për anëtarë të lidhur me organizatën.
“Vëllazëria Myslimane” është një organizatë transnacionale e themeluar në Egjipt në vitin 1928 dhe për dekada ka qenë lëvizja kryesore opozitare në vend, edhe pse është shtypur fuqishëm nga autoritetet egjiptiane. Ajo u përmend në mënyrë të veçantë për shkak të shkurtimit të pushtetit të ish-presidentit Mohamed Morsi (2012–2013), i cili ndërroi jetë në 2019.
Organizata promovon një formë konservatore të Islamit politik dhe është tashmë e konsideruar si “terroriste” në disa vende të Lindjes së Mesme, përfshirë Arabinë Saudite.