Danimarka ka nisur zyrtarisht më 1 korrik kryesimin e radhës së Bashkimit Evropian dhe ka vendosur zgjerimin e Unionit si një nga prioritetet strategjike të presidencës së saj, me fokus të veçantë tek shtetet e Ballkanit Perëndimor, përfshirë Kosovën, si dhe Ukrainën dhe Moldavinë.
Zyrtarët danezë theksojnë se zgjerimi nuk është më thjesht një proces burokratik, por një imperativ gjeopolitik që ndihmon në ndërtimin e paqes dhe stabilitetit në kontinent. “Është investimi më i mirë strategjik që mund të bëjë Bashkimi Evropian,” deklaroi presidenti i Këshillit Evropian, Antonio Costa, gjatë një vizite në Danimarkë për nisjen e presidencës.
Megjithatë, pavarësisht angazhimit të presidencës, ambasadori danez në BE, Carsten Jensen, sqaroi se progresi në procesin e zgjerimit varet nga pajtimi i të gjitha vendeve anëtare. Ai shtoi se përparime reale janë të mundshme vetëm për vendet që nuk hasin kundërshtime nga asnjë shtet anëtar.
Kosova, e cila aplikoi për statusin e kandidatit në vitin 2022, vazhdon të përballet me vështirësi për shkak të mosnjohjes nga pesë shtete anëtare të BE-së, duke e lënë aplikimin të paprekur në sirtarët e Brukselit.
Presidenca daneze do të zgjasë deri më 31 dhjetor 2025 dhe pritet të fokusohet në forcimin e procesit të zgjerimit mbi bazën e meritave dhe vlerave evropiane.