Pentagoni ka dhënë dritën jeshile për t’i siguruar Ukrainës raketat me rreze të gjatë veprimi “Tomahawk”, duke vlerësuar se kjo nuk do të kërcënonte rezervat strategjike amerikane. Vendimi politik për përdorimin e tyre mbetet në duart e Presidentit Donald Trump, sipas raportimeve të CNN.
Raketat “Tomahawk” kanë një rreze veprimi prej rreth 1,000 miljesh dhe synohen për të goditur objektet kyçe të energjisë dhe naftës në brendësi të Rusisë. Zyrtarët ukrainas i kanë kërkuar këto armë për të rritur efikasitetin në fushën e betejës.
Megjithatë, Trump ka pasur dyshim fillimisht. Gjatë një dreke pune me presidentin ukrainas Volodymyr Zelensky në Shtëpinë e Bardhë, ai shprehu rezervën se SHBA-ja mund t’i kishte nevojë raketat për mbrojtjen e saj. Vetëm pak ditë më vonë, gjatë një takimi tjetër me Zelensky, presidenti ndryshoi qëndrim, duke deklaruar se SHBA-ja “kishte nevojë” për “Tomahawks”, por shtoi se përdorimi i tyre do të varet nga vendimi i tij përfundimtar.
Vendimi i Trump erdhi pas një bisede telefonike me presidentin rus Vladimir Putin, i cili paralajmëroi se raketat mund të godisnin qytetet e mëdha si Moska dhe Shën Peterburgu, duke rrezikuar marrëdhëniet dypalëshe, por pa ndikim të drejtpërdrejtë në betejë.
Aktualisht, Pentagoni po shqyrton mënyrën më të sigurtë për t’i përdorur raketat dhe si Ukraina mund t’i trajnojë trupat për operimin efektiv të tyre. Raketat lëshohen zakonisht nga anijet sipërfaqësore ose nëndetëset, por duke qenë se Ukraina nuk ka kapacitete të forta detare, përdorimi i tyre në tokë pritet të jetë alternativa kryesore.
Administrata amerikane ka paralajmëruar se “Tomahawk” mbeten një opsion i gatshëm dhe mund t’i ofrohen Ukrainës menjëherë nëse Trump vendos për këtë.