Pas një rritjeje rekord ditën e hënë, çmimi i arit pësoi një rënie dramatike, e cila shënoi rënien më të madhe që nga prilli i vitit 2013. Të martën, çmimi i menjëhershëm i arit ra me 6,3% në 4.082,03 dollarë për ons, ndërsa kontratat amerikane të së ardhmes për arin u ulën me 5,7% në 4.087,70 dollarë për ons. Sot, tregu ka shënuar një rikuperim të vogël, me çmimin e arit në 4.141,48 dollarë, një rritje prej vetëm 0,4%.
Analistët shpjegojnë se rënia erdhi si pasojë e shitjeve masive pas javësh blerjeje intensive, që çuan çmimin e arit në nivele të mbinxehura. Optimizmi përpara raundit të ri të negociatave tregtare midis Shteteve të Bashkuara dhe Kinës, si dhe rikuperimi i dollarit, kanë shtyrë investitorët të realizojnë fitimet e tyre.
Rënia e arit u shoqërua edhe me ulje të çmimeve të argjendit dhe platinit, përkatësisht me 7% dhe 5%. Gjatë vitit 2025, ari ka shënuar rritje historike mbi 50%, duke tejkaluar periudha turbulente si pas sulmeve të 11 shtatorit, krizës financiare të vitit 2008 dhe pandemisë së Covid-19.
Sipas ekspertëve, faktore shtesë që ndikuan në rënien e çmimeve përfshijnë përfundimin e festivalit Diwali në Indi, konsumatori i dytë më i madh i arit në botë, që uli kërkesën fizike për metalin, si dhe optimizmin për zbutjen e tensioneve tregtare ndërkombëtare.