Një ngjarje e rëndë ka tronditur mesditën e sotme fshatin Kuman në Roskovec, ku një çift i moshuar është gjetur i pajetë në banesën e tyre, në një rast të dyshuar si vrasje–vetëvrasje.
Sipas informacioneve paraprake, 80-vjeçari Shefit Rrapaj dyshohet se ka qëlluar me armë zjarri bashkëshorten e tij, Dashuri Rrapaj, rreth 75 vjeçe, dhe më pas i ka dhënë fund jetës. Ngjarja dyshohet të ketë ndodhur brenda banesës së tyre.
Çifti Rrapaj kishte rreth 20 vite që jetonte në këtë zonë, pasi ishte zhvendosur nga Levani i Beratit. Ata ishin prindër të 9 fëmijëve, 3 vajza dhe 6 djem, shumica prej të cilëve jetojnë në emigracion. Njëri prej djemve banonte me ta dhe është shoqëruar nga policia për të dhënë dëshminë e tij lidhur me rrethanat e ngjarjes.
Burime nga zona bëjnë me dije se në familje kanë ekzistuar konflikte të vazhdueshme prej kohësh. Vetëm pak ditë më parë, policia kishte ndërhyrë në banesë për të sqaruar mosmarrëveshje mes çiftit. Po ashtu, rreth 10 vite më parë, i moshuari kishte tentuar t’i jepte fund jetës me armë zjarri.
Grupi hetimor ndodhet në vendngjarje dhe po punon për zbardhjen e plotë të rrethanave të kësaj ngjarjeje të rëndë.